ՀԱՂՈՐԴԱԳՐՈՒԹՅՈՒՆ Իտալիայի խորհրդարանում ՀՀ դեսպան Ռ.Կարապետյանի հանդիպման վերաբերյալ

04 նոյեմբերի, 2009

Ս.թ. նոյեմբերի 4-ին Իտալիայում ՀՀ դեսպան Ռ.Կարապետյանը հանդիպեց Իտալիայի խորհրդարանի նորաստեղծ »Հայ-իտալական բարեկամության« խմբի անդամների հետ: Հանդիպման ընթացքում խմբի նախագահ խորհրդարանի դեպուտատների պալատի պատգամավոր Սանդրա Զամպան /զբաղեցնում է և ներկայումս էլ հանդիսանում է նախկինում Իտալիայի վարչապետ, Եվրոպական Հանձնաժողովի նախագահ Ռոմանո Պրոդիի խոսնակը/ տեղեկացրեց ՀՀ դեսպանին, որ Հայաստանի բարեկամների խումբը Իտալիայի օրենսդիր մարմնում գնալով մեծանում է և ներկայումս այն ընդգրկում է 22 պատգամավոր:

Ռ.Կարապետյանը կարևորեց երկրի օրենսդիր մարմնում Հայաստանի բարեկամների հայանպաստ գործունեության ակտիվացումը և նրանց թվի ավելացումը: Ռ.Կարապետյանը պատգամավորների խնդրանքով ներկայացրեց հայ-թուրքական հարաբերությունների կարգավորման գործընթացը, ինչպես նաև ԼՂՀ հիմնախնդրի շուրջ ընթացող բանակցությունների ներկայիս վիճակը:

»Հայ-իտալական բարեկամության« խմբի անդամները հատուկ ընդգծեցին այն հանգամանքը, որ Հայաստանը Իտալիայի բարեկամն է և որ իրենք պատրաստ են ամենայն աջակցություն ցուցաբերել երկու երկրների միջև ոչ միայն միջխորհրդարանական համագործակցության, այլև Հայաստան-Իտալիա բարեկամության ամրապնդման ու զարգացման գործում:

Հանդիպման ընթացքում պայմանավորվածություն ձեռք բերվեց Իտալիայի խորհրդարանում կազմակերպել տարբեր միջոցառումներ /ցուցահանդեսներ, դասախոսություններ և այլն/, որոնք կօգնեն իտալացի օրենսդիրներին ծանոթանալ հայկական մշակույթի, պատմության և ներկայիս քաղաքականության հետ:

ՀՀ դեսպանն առաջարկեց ակտիվացնել միջխորհրդարանական կապերը և հրավիրեց իտալացի օրենսդիրներին այցելել Հայաստան և Արցախ` տեղում ծանոթանալու իրավիճակի հետ և քննարկելու համագործակցության ընդլայնման հետ կապված հարցերը: Ռ.Կարապետյանը պատգամավորներին փոխանցեց մի շարք նյութեր ԼՂՀ հիմնախնդրի իրավական ասպեկտների, ինչպես նաև Ադրբեջանում հայկական պատմամշակութային ժառանգության ոչնչացման վերաբերյալ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր