ՀՀ մշակույթի նախարար Հասմիկ Պողոսյանի Իտալիա այցելության վերաբերյալ

30 նոյեմբերի, 2009

Ս.թ. նոյեմբերի 24-27-ը Իտալիա այցելեց ՀՀ մշակույթի նախարար Հ.Պողոսյանը, որը մասնակցեց Մշակութային արժեքների պահպանման և վերականգնման համար ուսումնասիրությունների միջազգային կենտրոնի /ICCROM/ գլխավոր վեհաժողովին, ինչպես նաև հանդիպումներ ունեցավ կենտրոնի գլխավոր տնօրեն Մ.Բուշենակիի ու Իտալիայի մշակույթի նախարար Ս.Բոնդիի հետ:

Նախարար Հ.Պողոսյանը կազմակերպության գլխավոր տնօրենի հետ քննարկեց մի շարք հարցեր` կապված ՀՀ-ում մշակութային ժառանգության պահպանությանն ուղղված ծրագրերի իրականացման, համատեղ գիտաժողովների և ՀՀ-ում անդամ երկրների համար դասընթացների կազմակերպման հետ: ՀՀ մշակույթի նախարարը Մ.Բուշենակիին հրավիրեց այցելել Հայաստան` կենտրոնի հետ համագործակցության ուղիները հստակեցնելու և նոր ծրագրեր մշակելու նպատակով:

Ս.թ. նոյեմբերի 25-ին Հ.Պողոսյանը հանդիպեց Իտալիայի մշակույթի նախարար Սանդրո Բոնդիի հետ, որի ընթացքում քննարկվեցին հայ-իտալական մշակութային համագործակցության ընդլայնման, Իտալիայում և Հայաստանում տարբեր մշակութային միջոցառումների իրականացմանն առնչվող հարցեր:

Հանդիպման ընթացքում պայմանավորվածություն ձեռք բերվեց նախապատրաստել մշակույթի բնագավառում համագործակցության հուշագիր և գործնական ծրագիր 2010-2013թթ. համար: Իտալիայի մշակույթի նախարարը ողջունեց 2012թ. Իտալիայում «Հայ գրքի տարի» հռչակելու վերաբերյալ առաջարկը, ինչպես նաև խոստացավ Իտալիայի մշակույթի նախարարության կողմից սահմանել ամենամյա հատուկ մրցանակ գրականության բնագավառում հայերենից-իտալերեն և իտալերենից-հայերեն լավագույն թարգմանության համար:

Մշակութային արժեքների պահպանման և վերականգնման համար ուսումնասիրությունների միջազգային կենտրոնի /ICCROM/ գլխավոր վեհաժողովի աշխատանքներին մասնակցեց նաև ՀՀ քաղաքաշինության փոխնախարար, ՀՀ գլխավոր ճարտարապետ Ն.Սարգսյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր