ՀԱՂՈՐԴԱԳՐՈՒԹՅՈՒՆ Ս.թ. փետրվարի 27-ին Հռոմում տեղի ունեցած համահայկական առաջին հավաքի վերաբերյալ

27 փետրվարի, 2010

Ս.թ. փետրվարի 27-ին Հռոմում Իտալիայում ՀՀ դեսպանության նախաձեռնությամբ առաջին անգամ տեղի ունեցավ համահայկական հավաք իտալահայ բոլոր կազմակերպությունների ղեկավարների մասնակցությամբ:

Հավաքի ընթացքում քննարկվեցին օրակարգում ընդգրկված ՀՀ դեսպանության և իտալահայ համայնքային կառույցների միջև համագործակցության խնդիրները, մասնավորապես` հայ-իտալական երկկողմ հարաբերությունների զարգացում, Լեռնային Ղարաբաղի անկախության ճանաչման գործընթացի սատարում, Հայոց Ցեղասպանության 95-րդ տարելիցի հիշատակման միջացառումների կազմակերպում:

Միջոցառումը բացեց ՀՀ դեսպան Ռ.Կարապետյանը, որը հավաքի մասնակիցներին ներկայացրեց դեսպանության ծրագրերը 2010թ. համար և մասնավորապես այն ուղղությունները, ուր անհրաժեշտ է իտալահայության աջակցությունն ու ակտիվ ներգրավվածությունը : Ռ.Կարապետյանը որպես առաջնային ընդգծեց Լեռնային Ղարաբաղի հետ կապերի ակտիվացման, Հայաստանում ներդրումային ծրագրերի խթանման և Իտալիայում բազմաթիվ գիտամշակութային միջոցառումների կազմակերպման խնդիրները:

Այնուհետև ելույթ ունեցան հավաքի մասնակիցները, որոնք դեսպանին ներկայացրեցին իրենց առաջարկները դեսպանություն-իտալահայ համայնք համագործակցության սերտացման ուղղությամբ: Ելույթ ունեցողները հատկապես գոհունակությամբ նշեցին այն հանգամանքը, որ « նման ներկայացուցչական հավաք իտալահայ բոլոր կազմակերպությունների մասնակցությամբ դեսպանության հովանու ներքո կազմակերպվում է առաջին անգամ»:

Պայմանավորվածություն ձեռք բերվեց նախապատրաստել նամակ իտալահայ բոլոր կազմակերպությունների անունից ուղղված Իտալիայի խորհրդարանի բոլոր անդամներին` Ցեղասպանության 95-ամյակի կապակցությամբ: Ներկաները նաև համաձայնվեցին նման հավաք կազմակերպել յուրաքանչյուր տարի:

Հավաքն ավարտվեց Հռչակագրի /կցված է/ միաձայն ընդունմամբ, որը նույնպես որակվեց բացառիկ ոչ միայն իտալահայ կյանքում, այլև Հայաստան-Սփյուռք համագործակցության ուղղությամբ:

Հանդիպումից հետո ՀՀ դեսպանությունում կազմակերպվեց ընդունելություն, որի ընթացքում տեղի ունեցավ դեսպանության նոր նստավայրի օրհնման արարողությունը:

ՀՌՉԱԿԱԳԻՐ

ս.թ. փետրվարի 27-ին Հռոմում կայացած Իտալիայում ՀՀ դեսպանության և իտալահայ կազմակերպությունների առաջին հավաքի

Հաշվի առնելով

22 տարի առաջ փետրվարի 27-29-ին Սումգայիթում ադրբեջանցիների ցեղասպան գործողությունների արդյունքում հայ բնակչության կոտորածները,

ա/մեկ րոպե լռությամբ հարգեցին անմեղ հայ զոհերի հիշատակը

բ/ կոչ արեցին Իտալիայի իշխանություններին, հասարակությանն ու քաղաքակիրթ ողջ մարդկությանը` դատապարտել Սումգայիթյան կոտորածների կազմակերպիչներին ու իրականացնողներին:

Ղեկավարվելով

Հայ-իտալական երկկողմ հարաբերությունների զարգացման, Հայաստանի Հանրապետության պետականության հզորացման, Լեռնային Ղարաբաղի Հանրապետության անկախության ճանաչման և իտալահայության բարգավաճման շահերով,

Կարևորելով

Իտալիայում ՀՀ դեսպանության և իտալահայ բոլոր կազմակերպությունների միջև գործնական սերտ համագործակցության հաստատումը

Համազգային կարևորություն ունեցող հարցերի նկատմամբ միասնական գործելակերպի որդեգրումը,

Առաջնայնությունների հստակեցման, ջանքերի համադրման ու աշխատանքների համակարգման անհրաժեշտությունը,

Որոշեցին.

Նպաստել Հայաստան-Իտալիա համագործակցության զարգացմանը բոլոր բնագավառներում,

Մշակել միջոցառումների տարեկան ծրագիր համատեղ իրականացման համար,

Հանդես գալ նախաձեռնություններով ԼՂՀ ներկայությունը Իտալիայում շոշափելի դարձնելու ուղղությամբ / ԼՂ հիմնախնդրի վերաբերյալ Իտալիայում պատշաճ իրազեկում ու քարոզչության իրականացում, այցելությունների կազմակերպում, “Արցախի բարեկամների խմբի” ստեղծում բազմաբնույթ ծրագրերի իրականացում ԼՂՀ-ում/,

Հայոց Ցեղասպանության 95-րդ տարելիցի կապակցությամբ պատրաստել նամակ, ուղղված Իտալիայի խորհրդարանի բոլոր անդամներին և ստորագրված իտալահայ բոլոր կազմակերպությունների կողմից,

Մշտական ու անխափան դարձնել Իտալիայում ՀՀ դեսպանության և իտալահայ կազմակերպությունների միջև տեղեկատվության փոխանակումը` ՀՀ դեսպանության ընթացիկ գործունեության վերաբերյալ, ինչպես նաև իտալահայ կազմակերպությունների կողմից կազմակերպվող բոլոր միջոցառումների մասին:

Յուրաքանչյուր տարի կազմակերպել նման հավաք առնվազն մեկ անգամ նույն ձևաչափով

ՍՈՒՅՆ ՀՌՉԱԿԱԳԻՐԸ ՍՏՈՐԱԳՐԵՑԻՆ`

Միլանի Հայ Առաքելական Եկեղեցի

Մխիթարյան Միաբանություն

Քահանայապետական Լևոնյան Հայ Վարժարան

Իտալիայի Հայ համայնքի միություն

Անարատ Հղության Հայ Քույրերի Միաբանություն

Հայ Տուն – Միլան

Առաքելական Եկեզեցվո Հոգաբարձություն

Պո-Արաքս մշակութային ընկերակցություն – Վենետիկ

Վենետիկի Կա Ֆոսկարի Համալսարանի հայագիտական ամբիոն

Բոլոնիայի Համալսարանի հայագիտական անբիոն

Հռոմի Հայ Առաքելական Ժողովրդապետություն

Հռոմի Հայ Առաքելական համայնքի խորհուրդ

Հռոմի հայ համայնքի խորհուրդ

«ԻՏԱԼԻԱ-ԱՐՄԵՆԻԱ» հայ-իտալական բարեկամության համար

Հռոմի և Լացիո նահանգի հայ համայնքի ընկերակցություն

«Հայ ձայն» հրատարակչություն – Վենետիկ

Հայ-իտալական բարեկամության ընկերակցություն« ԶԱՏԻԿ »

« Ծիծեռնակ» ընկերակցություն – Ուդինե

«Ճշմարիտների անտառ» Կոմիտե - հայկական մաս

ԻՏԱԼԱՐՄԵՆԱ մշակութային ընկերակցություն – Մարտինա Ֆրանկա

Ռադիո Վատիկանի հայկական բաժին

Հայկական մշակույթի ուսումնասիրության և վավերագրման կենտրոն- Վենետիկ

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր