Անտոնիա Արսլանին ՀՀ Մշակույթի նախարարության Ոսկե մեդալով պարգևատրման արարողության վերաբերյալ

09 մարտի, 2010

Տեղեկացնում ենք, որ ս.թ. մարտի 7-ին Իտալիայում ՀՀ դեսպանությունում տեղի ունեցավ մեծանուն իտալահայ գրող, հայագետ, Պադովայի համալսարանի ժամանակակից իտալական գրականության պրոֆեսոր տիկին Անտոնիա Արսլանին ՀՀ Մշակույթի նախարարության Ոսկե մեդալով պարգևատրման արարողությունը, որին հաջորդեց պաշտոնական ընդունելությունը:

Անտոնիա Արսլանն իր ստեղծագործական կյանքն սկսել է Դանիել Վարուժանի բանաստեղծությունների ուսումնասիրությամբ և երկհատորյակի իտալերեն թարգմանությամբ, իսկ Հայոց ցեղասպանության թեման մշտապես առկա է նրա մենագրություններում:

Մեդալի հանձնման արարողությանը ողջույնի խոսքով հանդես եկավ դեսպան Կարապետյանը, որը ներկայացնելով տիկին Արսլանի բազմամյա բեղմնավոր գործունեությունը և անսահման նվիրվածությունը հայ ժողովրդին, հատկապես կարևորեց նրա մեծ ներդրումը հայ-իտալական բարեկամության խորացման գործում:

Ի պատասխան տիկին Արսլանը, մեծ գոհունակությամբ և երախտագիտությամբ ընդունելով Ոսկե մեդալը, նշեց որ լինելով բազմաթիվ մրցանակների դափնեկիր (Premio Campiello, Premio Stresa Di Narrativa, Pemio P.E.N., Premio Manzoni և այլն), առաջին անգամն է, որ արժանանում է Հայաստանի Հանրապետության կառավարության պարգևի:

Միջոցառմանը ներկա գտնվեցին գրողներ, դասախոսներ, արվեստագետներ, այդ թվում, հայ հասարակությանը քաջ հայտնի` Անտոնիա Արսլանի «Արտույտների ագարակը» (La masseria delle allodole) վեպի վրա հիմնված համանուն ֆիլմի հեղինակներից, Պաոլո Տավիանին, ինչպես նաև իտալահայ համայնքային կառուցների ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր