ՀՀ դեսպան Ռուբեն Կարապետյանի Սլովենիայի նախագահ Դանիլո Տյուրկին հավատարմագրերը հանձնելու վերաբերյալ

10 մայիսի, 2010

2010թ. մայիսի 4-ից 8-ը Սլովենիայի Հանրապետություն կատարած իր առաջին պաշտոնական այցելության շրջանակներում` ՀՀ նորանշանակ դեսպան Ռ. Կարապետյանն ս.թ. մայիսի 4-ին իր հավատարմագրերը հանձեց երկրի նախագահ պարոն Դանիլո Տյուրկին:

Հավատարմագրերի հանձման արարողությանը նախորդեցին ՀՀ դեսպանի հանդիպումները երկրի Դիվանագիտական արարողակարգի ղեկավար, դեսպան Մայա Լովրենչիչ Սվետեկի, ԱԳՆ Քաղաքական տնօրեն Մատեյ Մարնի և ԱԳՆ Արևելյան Եվրոպայի և Միջին Ասիայի երկրների վարչության պետ Նատաշա Պրահի հետ: Նշված հանդիպումների ընթացքում մանրամասն քննարկեցին հայ-սլովենական հարաբերությունների ներկա փուլը և զարգացման հեռանկարները, երկու երկրների ԱԳՆ միջև քաղաքական խորհրդատվությունների կարևորությունը, ինչպես նաև ս.թ. հոկտեմբեր ամսին նախատեսված Սլովենիայի նախագահի Հայաստան կատարելիք այցելության մանրամասները: Հանդիպումների ընթացքում հատուկ անդրադարձ կատարվեց երկու երկրների միջև առևտրա-տնտեսական հարաբերությունների զարգացման և ներդրումների խթանման և գոյություն ունեցող ներուժի լիարժեք օգտագործման խթանմանը:

Սլովենիայի նախագահական պալատում հավատարմագրերի հանձնման արարողությանը հաջորդած զրույցի ընթացքում, որը տևեց շուրջ մեկ ժամ, Սլովենիայի նախագահի խնդրանքով դեսպան Ռ. Կարապետյանը մանրամասն ներկայացրեց ԼՂ հիմնահարցի բանակցային գործընթացի ներկա փուլը, ՀՀ-ԵՄ համագործակցության հիմնական ուղղությունները և հեռանկարները, ինչպես նաև հատուկ անդրադարձավ հայ-թուրքական արձանագրությունների ստորագրմանը հաջորդող զարգացումներին:

Սլովենիա կատարած այցի ընթացքում ՀՀ դեսպանը հանդիպեց երկրի Մշակույթի նախարար Մայդա Շիրկայի հետ: Հանդիպմանը հանգամանալից քննարկվեցին մշակութային համագործակցության հեռանկարները, անդրադարձ կատարվեց երկրների մշակութային ժառանգության երկուստեք ներկայացման կարևորությանը: Նախարարը հատուկ շնորհակալություն հայտնեց Սլովենիայում Հայ փառատոնի կազմակերպման և աջակցության համար:

ՀՀ դեսպանն այցելեց նաև «Ցանկարև դոմ»` Սլովենիայի հեղինակավոր պատմա-մշակութային կենտրոնը, ուր հանդիպում ունեցավ վերջինիս Գլխավոր տնօրեն Միտյա Ռոտովնիկի հետ: Քննարկվեցին «Ցանկարև դոմ»-ում կազմակերպված, ինչպես նաև տարվա ընթացքում նախատեսվող բազմաթիվ միջոցառումների իրագործման մանրամասները, հատուկ անդրադարձ կատարվեց ս.թ. դեկտեմբերին Հայ փառատոնի փակման պաշտոնական արարողությանը բարձր մակարդակով մասնակցություն ապահովելու հարցին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր