Հայաստանի եւ Սլովենիայի արտգործնախարարների հանդիպումը

11 հոկտեմբերի, 2010

Հոկտեմբերի 11-ինՀայաստանիարտաքինգործերինախարարԷդվարդՆալբանդյանը հանդիպեց Սլովենիայի նախագահին ուղեկցող պատվիրակության կազմում Երեւան ժամանած իր սլովեն գործընկեր Սամուել Ժբոգարի հետ:

Ողջունելով հյուրին` Հայաստանի արտգործնախարարն ասաց. «Երկկողմ հարաբերությունների պատմության մեջ Սլովենիայի Նախագահի առաջին այցելությունը Հայաստան նոր լիցք կհաղորդի երկու երկրների միջեւ համագործակցությանը եւ այսօր ստորագրված համաձայնագրերը, ինչպես նաեւ Նախագահ Թյիրկի այցելության շրջանակներում կայանալիք ներկայացուցչական գործարար համաժողովը փոխգործակցության նոր փուլի առաջին քայլերն են»:

Նախարարները շարունակեցին սեպտեմբերի վերջին Նյու-Յորքում ունեցած քննարկումները հայ-սլովենական օրակարգի հարցերի շուրջ, մտքեր փոխանակեցին տարածաշրջանային խնդիրների վերաբերյալ:

Էդվարդ Նալբանդյանն ու Սամուել Ժբոգարն անդրադարձան Հայաստան –Եվրոպական Միություն հարաբերություններին, այդ ձեւաչափում իրականացվող ծրագրերին եւ տարեվերջին կայանալիք Արեւելյան գործընկերություն ծրագրի անդամ երկրների արտգործնախարարների հանդիպմանը:

Հայաստանի եւ Սլովենիայի արտգործնախարարները գոհունակություն հայտնեցին վերջերս ակտիվացած մշակութային փոխանակումների առնչությամբ, մասնավորապես` այս տարվա սկզբին Սլովենիայում կայացած Հայաստանի մշակույթի փառատոնի կապակցությամբ եւ կարեւորեցին նմանօրինակ միջոցառումների պարբերական կազմակերպումը:

Հանդիպումից առաջ նախարարներ Նալբանդյանն ու Ժբոգարը բացեցին հայ-սլովենական գործարար համաժողովը, որին մասնակցելու նպատակով Երեւան են ժամանել շուրջ հինգ տասնյակ սլովեն գործարար:

Հանդիպման կադրերը հնարավոր է ձեռք բերել հետեւյալ ինտերնետային կայքից` http://mail.mfa.am/video/video.html:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր