Հայաստանի եւ Իտալիայի արտգործնախարարների հանդիպումը

13 դեկտեմբերի, 2011

Դեկտեմբերի 13-ին ԱԳ նախարար Էդվարդ Նալբանդյանը, ով Հռոմում է գտնվում աշխատանքային այցով Իտալիա ժամանած Հայաստանի Հանրապետության Նախագահին ուղեկցող պատվիրակության կազմում, հանդիպեց Իտալիայի ԱԳ նախարար Ջուլիո Տերցիի հետ:

«Ես ուրախ եմ հանդիպել Ձեզ Հռոմում եւ անձամբ շնորհավորել արտգործնախարարի պաշտոնում նշանակվելու կապակցությամբ: Վստահ եմ, որ համատեղ ջանքերով մենք կկարողանանք առավել խորացնել մեր երկու երկրների միջեւ փոխշահավետ համագործակցությունը», - ասաց Էդվարդ Նալբանդյանը:

Զրույցի ընթացքում երկուստեք նշվեց, որ հայ-իտալական հարաբերություններն ունեն հազարամյակների պատմություն, որը հիշարժան է բարի ավանդույթներով եւ փոխադարձ բարեկամության դրսեւորումներով, եւ այդ ամենը ամուր հիմք է ստեղծում հարաբերությունների առավել ամրապնդման եւ խորացման համար:

Հայաստանի եւ Իտալիայի արտգործնախարարներն անդրադարձան հայ-իտալական քաղաքական, առեւտրատնտեսական եւ մշակութային հարաբերությունների զարգացման, իրավապայմանագրային դաշտի ընդլայնմանն առնչվող հարցերի:

Մշակութային փոխանակումների տեսանկյունից նախարար Նալբանդյանը կարեւորեց Հռոմում «Դվին.ՀայաստանիմայրաքաղաքըԵվրոպայիեւԱսիայիմիջեւ»եւՎենետիկում«Հայաստան. Քաղաքակրթությանդրոշմներ» ցուցահանդեսների անցկացումը եւ շնորհակալություն հայտնեց Իտալիայի կառավարության աջակցությամբ Հայաստանում մշակութային արժեքների վերականգնողական կենտրոնի հիմնադրման համար:

Բանակցությունների ընթացքում քննարկվեցին Հայաստան - Եվրոպական միություն համագործակցության տարբեր ուղղությունները, Եվրոպական հարեւանության քաղաքականության եւ Արեւելյան գործընկերություն ծրագրի շրջանակներում իրականացվող նախագծերը:

Հայաստանի եւ Իտալիայի արտաքին քաղաքական գերատեսչությունների ղեկավարներն անդրադարձան միջազգային եւ տարածաշրջանային խնդիրների: Այս համատեքստում արտգործնախարար Նալբանդյանը ներկայացրեց Լեռնային Ղարաբաղի հիմնախնդրի խաղաղ կարգավորման գործընթացի վերջին զարգացումները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր