ՀՀ դեսպան Ռուբեն Կարապետյանի հանդիպումը Իտալիայի տարածաշրջանային գործերի, զբոսաշրջության եւ սպորտի նախարար Պիեռո Նյուդիի հետ

20 մարտի, 2012

Մարտի 20-ին ՀՀ դեսպան Ռ.Կարապետյանը հանդիպում ունեցավ Իտալիայի տարածաշրջանային գործերի, զբոսաշրջության եւ սպորտի նախարար Պիեռո Նյուդիի հետ /Piero Gnudi/, որի ընթացքում քննարկեց նշված բնագավառներում հայ-իտալական համագործակցության խորացման հետ կապված հարցեր:

Դեսպանը նախարար Նյուդիին տեղեկացրեց այն մասին, որ վերջին տարիներին երկու երկրների միջեւ 2009թ. ի վեր օդային ուղիղ կապի հաստատումից հետո և իրականացված հետեւողական քարոզչության շնորհիվ, արձանագրվել է շոշափելի առաջընթաց զբոսաշրջության ոլորտում երկկողմ համագործակցության մեջ: Այս ընթացքում իտալացի զբոսաշրջիկների թիվը գրեթե եռապատկվել է` 2011թ. կազմելով Հայաստան այցելող ողջ զբոսաշրջիկների շուրջ 18 տոկոսը: Դեսպանը տեղեկացրեց նաեւ, որ Իտալիայում ՀՀ դեսպանության հովանավորությամբ վերջին մեկ տարվա ընթացքում կազմակերպվել են զբոսաշրջության ոլորտի հայ-իտալական երկու համաժողովներ Վենետիկում եւ Կալյարիում, ինչպես նաեւ «Սուրբ Ղազարից մինչեւ Հայաստան» նախագծի շրջանակներում ս.թ. մարտի 30-ին Երեւանում նախատեսվում է անցկացնել «Հայաստան Զբոսարջության զարգացման հնարավորությունները» գործարար համաժողով: Դեսպան Ռ.Կարապետյանը նախարարին հայտնեց, որ ընթացիկ տարվա նոյեմբերին Իտալիայի Պեստումի հեղինակավոր 15-րդ միջազգային հնագիտական զբոսաշրջային ցուցահանդեսին Հայաստանը կմասնակցի Պատվավոր հյուրի կարգավիճակով:

Հաշվի առնելով վերոհիշյալը, պայմանավորվածություն ձեռք բերվեց մոտ ապագայում երկու երկրների միջեւ Զբոսաշրջության բնագավառում համագործակցության վերաբերյալ համաձայանգիր ստորագրելու վերաբերյալ: Հանդիպման ընթացքում երկուստեք կարեւորվեց Հայաստանի եւ Իտալիայի նահանգների ու քաղաքների միջեւ միջեւ ապակենտրոնացված համագործակցության սերտացումը: Գոհունակությամբ արձանագրվեց, որ վերջին երկու տարվա ընթացքում համագործակցության վերաբերյալ փաստաթղթեր են ստորագրվել Իտալիայի եւ Հայաստանի 6 վարչատարածքային /մարզային եւ քաղաքային/ միավորների միջեւ:

Զրուցակիցների կողմից հատուկ ընդգծվեցին սպորտի բնագավառում համագործակցության զարգացման համար առկա հնարավորությունները: Այս կապակցությամբ, Ռ.Կարապետյանը նախարար Նյուդիին հրավիրեց այցելել Հայաստան` ս.թ. հոկտեմբերի 9-ին ֆուտբոլի աշխարհի առաջնության համար Երեւանում կայանալիք Հայաստան-Իտալիա խաղը դիտելու նպատակով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր