Հայոց ցեղասպանության 100-ամյակին նվիրված ցուցահանդես Տրեվիզոյում

16 հոկտեմբերի, 2015

Ս.թ. հոկտեմբերի 16-ին Իտալիայի Տրեվիզոյի (Treviso) քաղաքային խորհրդի նստավայր, հայտնի Տրեչենտոյի պալատում (Palazzo dei Trecento) կայացավ Հայոց ցեղասպանության 100-ամյակին նվիրված «Արմին Տեոֆիլ Վեգները և Անատոլիայի հայերը, 2015» խորագրով ցուցահանդեսի պաշտոնական բացման արարողությունը:

Ցուցահանդեսի բացմանը ելույթներ ունեցան Իտալիայում Հայաստանի դեսպան Սարգիս Ղազարյանը, Տրեվիզոյի քաղաքապետ Ջիովանի Մանիլդոն (Giovanni Manildo), քաղաքային խորհրդի նախագահ Ռոզի Ֆրանկոն (Rosi Franco), քաղաքապետարանի մշակույթի և զբոսաշրջության հարցերի պատասխանատու Լուչիանո Ֆրանկինը (Luciano Franchim), Միլանում ՀՀ պատվո հյուպատոս Պիետրո Քուչուկյանը, Իտալիայի հայերի միության նախագահ պրոֆ. Պայքար Սիվազլիյանը: Ելույթ ունեցողներն իրենց խոսքում անդրադարձան Արմին Վեգների գործունեությանը, կարևորեցին նոր ցեղասպանությունների կանխարգելումը՝ այդ նպատակով անհրաժեշտ համարելով հիշողության պահպանումը, ժխտողականության դեմ պայքարը և կրթական ծրագրերի իրականացումը:

Միջոցառմանը ներկա էին Տրեվիզոյի քաղաքային իշխանությունների, հասարակական ու մշակութային շրջանակների, հայ համայնքի և զանգվածային լրատվամիջոցների ներկայացուցիչներ:

Ցուցահանդեսի բացմամբ մեկնարկեց Հայոց ցեղասպանության 100-ամյակին նվիրված միջոցառումների շաբաթը, որի հովանավորներն են Իտալիայում Հայաստանի դեսպանությունը, Իտալիայում հայերի միությունը, Տրեվիզոյի քաղաքապետարանը և “Feder Piazza” հիմադրամը: Շաբաթը ներառում է 3 գիտաժողով, որոնցից երկուսը՝ ուսանողների համար, գրքերի շնորհանդեսներ, Հայոց ցեղասպանության թեմայով լավագույն շարադրության համար ուսանողների պարգևատրման արարողություն, փաստագրական ֆիլմի ցուցադրում և Տրեվիզոյի Մայր տաճարում Հայոց ցեղասպանության զոհերի հիշատակի պատարագ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր