Դեսպան Սարգիս Ղազարյանի աշխատանքային այցը Պալերմո

24 նոյեմբերի, 2015

Ս.թ. նոյեմբերի 24-25-ը կայացավ Իտալիայում Հայաստանի դեսպան Սարգիս Ղազարյանի աշխատանքային այցը Պալերմո:

Նոյեմբերի 24-ին նա հանդիպում ունեցավ Պալերմոյի քաղաքային խորհրդի նախագահ Սալվատորե Օռլանդոյի (Salvatore Orlando) հետ: Հանդիպման ընթացքում կողմերը քննարկեցին Հայաստանի և Սիցիլիայի միջև դարերի պատմություն ունեցող հարաբերությունները և դրանց զարգացման հնարավորությունները՝ հատկապես առևտրատնտեսական, զբոսաշրջության և մշակույթի ոլորտներում, Հայոց ցեղասպանության 100-ամյակին առնչվող հարցեր, փախստականների մեծ ներհոսքի հետ կապված Սիցիլիայի իրավիճակը:

Երեկոյան կայացավ դեսպան Սարգիս Ղազարյանի աշխատանքային ընթրիքը Պալերմոյի գործարար և առևտրաարդյունաբերական շրջանակների ղեկավար ներկայացուցիչների հետ: Դեսպան Սարգիս Ղազարյանը պատասխանեց ներկաների՝ Հայաստանի տնտեսական վիճակի, գործարար միջավայրի ու ներդրումային դաշտի և ներդրումային կոնկրետ ծրագրերի վերաբերյալ հարցերին:

Նոյեմբերի 25-ին տեղի ունեցան դեսպան Սարգիս Ղազարյանի հանդիպումները Պալերմոյի քաղաքապետ Լեոլուկա Օռլանդոյի (Leoluca Orlando) և Սիցիլիայի նահանգային խորհրդի նախագահ Ջիովաննի Արդիցոնեի (Giovanni Ardizzone): Հանդիպումներին քննարկվեցին Հայաստանի և Սիցիլիայի տեղական ինքնակառավարման մարմինների միջև տարբեր ոլորտներում համագործակցության զարգացման հեռանկարների, Եվրասիական տնտնտեսական միության և Եվրոպական Միության միջև համագործակցության զարգացման հնարավոր ոլորտների, Սիցիլիայում հայերի դարավոր ներկայության ու թողած ժառանգության հետ կապված հարցեր:

Կեսօրից հետո Սիցիլիայի ութ տասնյակից ավելի ձեռնարկությունների ներկայացուցիչների մասնակցությամբ կայացավ «Ճանաչենք մրցակցելու համար. Հայաստան՝ դարպաս դեպի Եվրասիա» խորագրով գործարար համաժողովը: Այն կազմակերպել էր Սիցիլիայի Եվրասիական կազմակերպությունը՝ Իտալիայում Հայաստանի դեսպանության հետ համագործակցությամբ: Ներածական խոսքով՝ «Հնարավորությունները և գործարար միջավայրը Հայաստանի Հանրապետությունում. նոր առանցքային կենտրոն Եվրասիա մուտք գործելու համար» խորագրի ներքո հանդես եկավ Սիցիլիայի Եվրասիական կազմակերպության նախագահ Նունցիո Պանձարելլան (Nunzio Panzarella): Դեսպան Սարգիս Ղազարյանը և դեսպանության աշխատակից Սոնիա Կիարոտտոն (Sonia Chiarotto) ներկայացրեցին Հայաստանի տնտեսական իրավիճակը, ներդրումային ծրագրերն ու մակրոտնտեսական ցուցանիշները, Եվրասիական տնտեսական միությանը Հայաստանի անդամակցության հետ կապված տնտեսության զարգացման նոր հնարավորությունները:

Միջոցառմանը ներկա էին և ելույթներ ունեցան Սիցիլիայի նահանգապետ Ռոզարիո Կրոչետան (Rosario Crocetta), փոխնահանգապետ Մարիա Լո Բելլոն (Maria Lo Bello), Պալերմոյի քաղաքապետ Լեոլուկա Օռլանդոն, Սիցիլիայի նահանգային խորհրդի նախագահ Ջիովաննի Արդիցոնեն, սիցիլիական մի շարք ձեռնարկությունների ղեկավարներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր