Հայոց ցեղասպանության 100-ամյակին նվիրված գրքի շնորհանդես Հռոմում

16 դեկտեմբերի, 2015

Ս.թ. դեկտեմբերի 16-ին Հռոմում կայացավ «Հայոց ցեղասպանություն. 100 տարվա լռություն» (“Il Genocidio Armeno: 100 Anni di Silenzio”) գրքի շնորհանդեսը: Գիրքը հրատարակվել է 2015թ.՝ Իտալիայում Հայաստանի դեսպանության և «Ասսադակա» Իտալա-արաբական և Միջերկրածովյան կենտրոնի (Italian-Arab and Mediterranean Center Assadakah) համատեղ ջանքերի արդյունքում: Հեղինակներն են Ալեսսանդրո Արամուն, Աննա Մացցոնեն և Ջիան Միկալեսսինը (Alessandro Aramu, Anna Mazzone, Gian Micalessin):

Գրքի շնորհանդեսը կազմակերպել էր Իտալիայում Հայաստանի դեսպանությունը:

Միջոցառման մոդերատորն էր լրագրող և հրապարակախոս Նաման Տարկան (Naman Tarcha): Գիրքը ներկայացրեցին և Հայոց ցեղասպանության մասին բանախոսեցին «Ասսադակա» Իտալա-արաբական և Միջերկրածովյան կենտրոնի նախագահ Ռայմոնդ Սկիավոնեն (Raimond Schiavone), գրքի հեղինակներից Ալեսսանդրո Արամուն, Աննա Մացցոնեն և լուսանկարիչ Ռոմոլո Էուկալիտոն (Romolo Eucalitto):

Նրանք խոսեցին Հայաստան իրենց այցելության և ցեղասպանության ականատես վերջին վերապրածների հետ իրենց հանդիպումների մասին, անդրադարձան թուրքական ժխտողականությանը և տեսակետ հայտնեցին, որ ցեղասպանությունը հայերի համար կշարունակի այնքան ժամանակ «բաց վերք» մնալ, քանի դեռ Թուրքիան չի ընդունել իր նախնիների կողմից հայերի հանդեպ իրականացված ոճրագործությունը: Նրանք նաև կարևորեցին Իտալիայի հանրային կրթական հաստատություններում ցեղասպանությունների, այդ թվում՝ Հայոց ցեղասպանության մասին կրթական ծրագրերի ուսուցումը՝ դա համարելով նոր ցեղասպանությունների կանխարգելման անհրաժեշտ բաղադրիչ:

Միջոցառմանը ներկա էին ուսանողներ, հասարակական ու քաղաքական գործիչներ, հայ համայնքի և զանգվածային լրատվամիջոցների ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր