Հայոց ցեղասպանության 100-ամյակին նվիրված գրքի շնորհանդես Պիաչենցայում

07 նոյեմբերի, 2015

Ս.թ. նոյեմբերի 17-ին Իտալիայի Պիաչենցա (Piacenza) քաղաքում (Էմիլիա Ռոմանիա նահանգ - Emilia-Romagna) կայացավ Ալեսսանդրո Արամուի, Աննա Մացցոնեի ու Ջիան Միկալեսսինի «Հայկական ցեղասպանություն. 100 տարվա լռություն» (“The Armenian Genocide: 100 years of silence”- Alessandro Aramu, Anna Mazzone and Gian Micalessin) գրքի շնորհանդեսը: Գիրքը հրատարակվել է 2015թ.՝ Իտալիայում Հայաստանի դեսպանության և Ասսադակա» Իտալա-արաբական և Միջերկրածովյան կենտրոնի (Italian-Arab and Mediterranean Center Assadakah) համատեղ ջանքերի արդյունքում:

Շնորհանդեսն Իտալիայում Հայաստանի դեսպանության հովոնավորությամբ կազմակերպել էր Պիաչենցայի բանկը (Banca di Piacenza):

Միջոցառմանը ողջույնի խոսքով հանդես եկան և Հայոց ցեղասպանության 100-ամյակի առթիվ հայ ժողովրդին իրենց համերաշխությունը հայտնեցին Պիաչենցայի քաղաքապետ Պաոլո Դոզին (Paolo Dosi) և եպիսկոպոս Մոնսինյոր Ջիաննի Ամբրոզիոն (Mons. Gianni Ambrosio):

Գիրքը ներկայացրեցին և Հայոց ցեղասպանության մասին բանախոսեցին Իտալիայի ժողովրդական բանկերի ասոցիացիայի նախագահ Կոռադո Սֆորցա Ֆոլիանին (Corrado Sforza Fogliani), արվեստաբան, պրոֆեսոր Կարլո Ջիարելլին (Carlo Giarelli), պատգամավոր Ջանլուկա Պինին (Gianluca Pini): Բանախոսներն անդրադարձան նաև վարդապետ Դոն Ջիամպիերո Էզոպիի (Don Giampiero Esopi) կողմից կազմակերպած իտալացիների խմբի Հայաստան այցելության մասին “Il Piacenza” թերթի հրապարակած Կարլո Ջիարելլիի հեղինակած հոդվածաշարին և տարվա ընթացքում Պիաչենցայում Հայոց ցեղասպանության 100-ամյակի առթիվ անցկացված այլ միջոցառումների:

Այնուհետև հատվածներ ընթերցվեցին «Հայկական ցեղասպանություն. 100 տարվա լռություն» գրքից:

Միջոցառումը եզրափակվեց Իտալիայում Հայաստանի դեսպան Սարգիս Ղազարյանի ելույթով: Նա գոհունակություն հայտնեց, որ Հայոց ցեղասպանության և ընդհանրապես ցեղասպանությունների թեման այլևս մտահոգում է ոչ միայն Իտալիայի մտավորականությանն ու ակադեմիական շրջանակներին, այլև քաղաքացիական հասարակությանն ու հանրության լայն շերտերին՝ հատկապես Միջին Արևելքի ներկայիս իրավիճակի և այսպես կոչված Իսլամական պետության կողմից աշխարհի տարբեր վայրերում, օրերս նաև Փարիզում իրականացվող ահաբեկչական գործողությունների համատեքստում: Խոսելով Հայոց ցեղասպանության 100-ամյակի ոգեկոչման խորհրդի մասին, նա ընդգծեց, որ այն իր մեջ պարունակում է պայքար մարդկության դեմ ոճիրների մասին հիշողության պահպանման համար, պայքար դրանց ժխտողականության դեմ և պայքար հանուն նոր ցեղասպանությունների կանխարգելման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր